Sangkan Ji Ku

PANGKALAN BALAI, HARIANBANYUASIN.COM - Wak Barab Cs pacak nian ngipasi Mang Napi, sampe-sampe mang Napi geregetan nyelek kantinye kene dor  oleh Plisi. Nah, Mang lantak kela, kalu nian agek nak jere.

 

Dang ngobrol lemak-lemak dengan Wak Barab Cs, Mang Napi nyelekke Rai masam, awak lah jehet tambah jeahet. Mang Napi  marah karne ditanyei oleh Wak Barab tentang kantinye yang tetangkap plisi tu.

 

"Mak mane kabar kanti kite sikok tu mang, anak buah kamu kanti tu ken?. Ape boleh buat Mang memang lah suratan tangan, dak pacak nak ngelak kenye lagi," cerite Wak Barab.

 

Nengar cerite Wak Barab, Lang Mang Napi ngegas. "Bele kenyelah, budek buyen, lah tau bahaye. Masih nak melok. Laju kene pelor. Kendak aku tu, befikir sehat, awak tu dak kale gawe mek tu," rutuk Mang Napi.

 

Tesenge Wak Uban nengar ocehan Mang Napi. "Itu tu gara-gara buntu, nak belanje tak pacak, mulut masam. Balek ke rumah dikaji bini, lokak tak dapat pule, palak pening. Akhirnye ngambek jalan pintas. Mencari lokak dapat duet lemak," uji Wak Uban.

 

Mang Napi termenung dikit nengar omongan Wak Uban. "Hangkan jiku, kalu bukan gewe kite jengan melok-melok. Kite buken pemain, belum bepengalaman, akhirnye tejebak, ituken jedinye," timpal Mang Napi.

 

Wak Barab merase bekanti dengan sanak Mang Napi tu. "Itulah Mang memang lah takdir, base idupni kadang beruntung, kadang sial. Kadang berade di atas, kadang berade dibawah," katenye.

 

Sumber: