Madu Asli

PANGKALAN BALAI, HARIANBANYUASIN.COM - Tesiar kabar banyaknye pelaku kejahatan pencurian motor, pembegalan motor meresahkan masyarakat di daerah Wak Barab. Motor anak Wak Barab Cs nyaris jadi sasaran pencurian untung cepat tau, akhirnye kedapatan di Pulau Harapan. Nah kau!

 

Nyelek urang yang kedapatan maling motor di desa Pulau Harapan tekejut anak Wak Barab, karne ciri-ciri pelaku same benar dengan urang yang nak maling motornye di Desa Langkan. Tapi gagal karne ketauan.

 

"Ai bak, jela nian urangnye yang wara-wiri liwat di depan Ruko aku tadi, karne katauan laju belari. Urangnye bedue naek motor. Rupenye malingnye di Pulau kadapatan dikeroyok urang. Itulah lalu tak endak begawe, ngeluarke tenaga laju bonyok," cerite anak Wak Barab.

 

BACA JUGA:Sering Lupe

 

Tesenge Wak Barab nengar omongan anaknye. "Itulah nak, ati-ati bae karne kalu barang nak ilang tuh dimane be maseh ilang, tapi kalu tak endak rugi walaupun mak mane usaha urang nak maling, tapi gagal. Cuma bak mintak kau waspada bae jangan sampe jadi korban," nasehat Wak Barab.

 

Temangu anak Wak Barab nengar omongan Baknye. "Iye nian Bak, kalu nak rugi tu dimane bae maseh rugi. Tapi kalu lah sialnye ape boleh buat. Karne belum sial, tapi urang yang maling laju bernasib sial digebuki urang sekampung," celoteh anak Wak Barab.

 

Wak Uban yang milok nengar gesa urang due beranak tu cuma nyengir. "Makenye jangan lengah, karne kejahatan tak ngenal waktu, tak ngenal urang, makenye beli gembok besak-besak, kunci motor. Kalu lah dikunci maseh juge nak ilang, ape boleh buat memang nak rugi. Kalu lah rugi jangan pule laju besedih, ambek hikmahnya," nasehat Wak Uban.

 

Sumber: