Rai Jahat

PANGKALAN BALAI, HARIANBANYUASIN. COM - Memang rai Wak Barab Cs agak brongosan, segi empat banyak urang agak takut.

 

Ape lagi teberengut, tambah serem, idak teberengut bae lagi serem. Nah, ngape mak itu kanti.

 

Kalu diselek dari perawakan memang katek nian ambe'an, rai serem, awak kecik, rambut jarang. Kapan tesenge gigi banyak bolong, kapan begesa riau magau.

 

"Ngapelah kanti, banyak urang nyelek kite agak ngeri, ape penampilan kite kumel, ape rai kite serem, diajak begesa bae urang tak endak," uji Wak Uban begesa serius nian.

 

Laju tesenge Wak Barab nengar omongan kantinye.

 

"Dak pacak nah merobahnye kanti, memang sudah bawaan dari sononye," ucap Wak Barab.

 

"Tapi jangan salah, rai bae serem, kalu ati kite baek kanti, cuma sayang buntu tulah," komentar Wak Barab.

 

Laju bekomentar Mang Tam nengar gesa Wak Barab.

 

"Mak niari, percuma wajah ganteng, penampilan belagak, banyak harte. Karne tegantung di naseb," simbat Mang Tam.

 

"Maseh mending awak itam, kecik kurus, asak makan banyak gemuk tula. Kalu baek naseb nak nyalon ape bae jadi gale," uji Mang Tam.

 

Rupenye omongan Mang Tam nyasar ke kantinye.

 

"Tak acak juge kanti, kalu kite cuma ade napsu, katek modal, cuma modal omongan besak, tak kade didengar urang," uji Mang Tam.

 

"Apelagi kalu memang modal hawe, dem, jangan banyak kendak," komentar mang Tam.

 

Langsung Wak Uban ngangkat jempol.

 

"Tak ke meleset kanti, kalu nak bejuang tu harus ade pelor, tak zamannya lagi bambu runcing. Kalu amunisi dikit, KO nian dikepung musuh," uji Wak Uban sambel tersenyum.

 

"Ye lah, namenye perjuangan tu memang berat, jadi kapan bakal tak terengkuh, lemaklah undur diri secara terhormat, supaye urang senang. Kalu nian agek ade tuah," nasehat Wak Barab.*

Sumber: