PANGKALAN BALAI, HARIANBANYUASIN.COM - Kalu umur sudah kepala lime atau 50 taun, segale barang di badan mulai kendor termasuk ingatan kendor. Jadi pelupe. Tak jarang Wak Barab kene segak gara-gara nemen gine betanye. Nah Wak, lah tue nian retinye.
Baru dudok di warung Cek Leha pagi kemarin, Wak Barab ditepak oleh orang bagian bahunye. Langsung tekejut Wak Barab het..het...het..langsung tangan Wak Barab bemaen, maklum pernah belajar silat di perguruan Kuntau Solihin.
Kapan terbelalak myelek keatas, langsung bingung Wak Barab Cs. Kantinye juga tesenge. "Ingat dak dengan kanti lame, waktu galak maen dakocan duluni," tanye lanti Wak Barab Cs.
Terang be Wak Barab dan Wak Uban dak ingat lagi, karne waktu empat puloh tahun silam. "Cacam kanti aku terkejut nian tadi. Aku pikir urang nah hipnotis, untung dak kulanjakke," tutur Wak Barab sambel bekelakar.
"Agek dulu aku kenangke dulu. Sape ye," uji Wak Barab sambil memperhatike wajah kantinye dari atas ke bawah.
Same halnye dengan Wak Uban juge bingung. "Nah kau, lah lupe maklum faktor umor lah tue, maklumi be kanti, kite lah lame dak betemu, jadi lupe nian. Jangan be tersinggung," uji Wak Uban sambel tesenge.
Setelah direnunginye ternyata memang kanti lamenye. Langsung bepelokan urang betige tu. "Cacam kanti aku dak kenal lagi, maklum awak tu maseh cak budak mude, stelannye make span Levis, baju kaos, pake topi, Mak Koboy kucai," gesa Wak Barab.
Langsung tetawe Cek Leha nengar omongan Wak Barab. "Awak same bae, lahtue maseh nak ngaku mude, lah becucung tapi selera mude. Retinye setali due uang, Mak jika urang zaman dulu," ejek Cek Leha.