PANGKALAN BALAI, HARIANBANYUASIN.COM - Kalu lokak lemak pasti banyak yang betanye, tapi kalu lokak sare jangan ke nak betanye, ditoleh bae idak. Cacam kanti alangke segonye ken?.
Namenye sifat manusie, nak lemak tula, dak katek yang nak sare. Kapan bebunyi ade lokak dak' itulah yang selalu diomongke tiap ade acara ape bae.
"Dak pacak ngatekenye kanti, base kite ade acara tu siap korban, mulai dari korban perasaan, korban omongan urang, korban duet, korban fitnah. Maklum urang banyak," uji Wak Uban di salah satu acara.
Wak Barab membenarke omongan Wak Uban. "Kalu tak endak jadi korban janganlah ngadeke acara," oceh Wak Barab.
"Pendap bae duet, simpan di dalam bantal, atau di bawah kasur supaye tak keluar. Kapan nak belanje kagek, duet lah abes dimakan rampe alias rayap," tanggap Wak Barab.
Tesenge Wak Uban nengar omongan Wak Barab. "Itulah kanti, kalu namenye harte dengan duet tu, kadang jadi jin, kadang jadi malaikat, kadang jadi antu, karne gara-gara duet urang ribut besanak, ribut bekanti, ribut dengan bini, tapi ade juge kadangtu pacak nolong urang, pacak merenganke beban urang," tutur Wak Uban.
Nah setuju nian Wak Barab dengan Wak Uban. "Tapi kalu dapat duet, dapat harte dari jalan benar, hasilnya benar pule kanti, kapan dibelanjeke makanan jadi darah daging nian," kate Wak Barab.
"Tapi kalu dapat lokak dari jalan tak benar, kapan diguneke laju ngitung dose. Dimakan anak bini beduse. Disedekahke beduse, dimakan dewek tambah bedose. Apelagi diguneke ditempat maksiat, tambah belipat dosenye," uji Wak Barab cak berseh nian mak tak bedose.