PANGKALAN BALAI, HARIANBANYUASIN.COM - Banyak nian urang mak ni ari mintak kateke mude, pada hal umur tak pacak dibudike. Apelagi Wak Barab CS selalu mintak kateke mude tula. Cacam kanti, bebenar be oi.
Berkali-kali Wak Uban ngetik pesan di Hp salah terus, karne faktor umur, mate lah kabur, pikiran berayau, storing banyak, palak pening, ditambah buntu pule, akor nian. Mak mane begawe nak konsentrasi.
"Payo kanti ape mate tu lah kabur nian, karne banyak nian ketikan salah huruf, pake kace mate kanti kalu ngetiktu. Soalnye kagek kate-kate diketikan tu salah reti. Melantik laju teketik melantaik, nah gawat kalu lah jadi mek tu," kelakar Wak Barab.
BACA JUGA:Salah Pegang
Langsung tesenge Wak Uban nengar omongan Wak Barab. "Kalu salah pandangtu tu biase be kanti, karne mate tak pasat lagi, jangan be salah pegang, gawat laju, sisip dikit mintak pertangungjawaban, nak kemane kite belari," simbat Wak Uban.
Pecaknye tak benar lagi Wak Barab Cs ni begesa, laju ditanggapi oleh Cek Leha.
"Kapan lah merase mate kabur, rambut ubanan, kulit kendor, tenaga loyo, cuma besak nafsu be, payo befikir oy, retinye tu lah tuer, jangan banyak ke dose," tegur Cek Leha.
BACA JUGA:Cuma Gertak
Dem masuk nian ceritenye, karne dibumbui oleh Mang Jau.
"Iye pule dak cek, jangan selalu befikir nak mencarut tula, kapan bebunyi nak mencari lokak, nak mencari budak belagak," rutuk Mang Jau.
"Cube sesekali befikir mak mane nak mencari surge, mencari pahale," sindir Mang Jau awak maseh budak, pacak pule nasehati urang tue.
BACA JUGA:Naseb tak Betuah
Dem tediam gale gara-gara disindir Mang Jau. "Kitekan cuma cerite hiburan, bekelakar, kalau dak mak ini, makenye kelman dunie. Awak tue tambah tue, rai kencang laju kendor, palak lemak laju saket, karne merengut sepanjangan. Makenye galak-galak tesenge, supaye awet mude," elak Wak Barab.(*)