PANGKALAN BALAI, HARIANBANYUASIN.COM - Wak Barab memang bukan urang nak menang dewek. Tapi segale omongan dipikirke nian jangan sampe urang tesinggung. Tapi kalu tepakse ape boleh buat, melawan dikit, dilanjakke hahaha, cacam Wak ni.
Banyak nian urang ni ngomong besak, nak bergaya care urang kaye, pada awak buntu same dengan Wak Barab Cs, nak meli rokok maseh berasan dengan urang rumah (bini).
"Nah...nah, budak sikok ni galak nian nak bertengkar, kapan ngomong nak benar dewek, segale gawe urang nak tau," oceh Wak Barab.
"Kapan besumbar segale pejabat sanaknye gale. Untung bae malaekat dengan antu dak diakui sanaknye," uji Wak Barab.
Nengar omongan Wak Barab, langsung tesenge Wak Uban.
"Care urang cak itu, jangan pule diagukke kanti, maklumi bae. Karne care urang, laen dengan care kite, kalu duaguk'i agek laju ngijak palak, nah balak laju," uji Wak Uban.
Ngangguk-ngangguk Wak Barab mak burung terkutut.
"Benar nian kanti, kapan apload foto di restoran, naek mobil bergaya ditunjukke dengan urang. Posting ngadap pejabat, nganca'i duet banyak di FB. Itulah care urang, mungkin care kite laen," Simbat Wak Barab.