HARIANBANYUASIN.COM -Lame nian Wak Uban merenung di ujong garang, mikirke larangan presiden Jokowi tak boleh meli rokok ketengan. Maklum nak meli bungkusan awak tadi buntu, dimarah bini pule, nak berutang urang tak percaye.
"Kalu pemerentah lah melarang meli rokok batangan, pacak nian taun 2023 kegek mulut masam sepanjangan kanti, soalnye kite bukan urang sugeh nak meli bungkusan tu,"uji Wak Uban agak pilu nengarnye.
Tesenge bae Wak Barab nyelek tingkah Wak Uban.
"Bapaaak uy! kesiannye ken, ngopi kuat, ngudut kuat, nak berasan dengan kanti kagek tak diagu'i, tepakse mencari puntung rokok di dalam asbak," sindir Wak Barab.
Pening Wak Uban mikirkenye. "Ape boleh buat kanti, milo'i be larangan dari pemerentah. Nah, tepakse balek kebiasaan lame, melinting tembako sindang dengan daun nipah (rokok pucok-red) kalu nak ngudut," simbat Wak Uban.
Langsung dikolake Wak Barab. "Ati-ati be kanti ngisap rokok pucok tu. Aku ingat gawe lame kantiku dulu. Pecak kepakan nian, sat-sut ngisap rokok pucok, tak sampe 10 menit langsung mati," timpal Wak Barab.
Tecongak keatas palak Wak Uban. "Bebenar be kanti, jangan nakut-nakuti. Awak tadi nak ngurangi pengeluaran, tau-taunye dapat balak, tepakse berenti ngudut, berenti benapas laju," aku Wak Uban.
Rupenye Wak Uban kurang nyambung nengar omongan Wak Barab tadi. "Maksudku kanti, gara-gara ngudut rokok pucok, apinye tecelup ke dalam kopi, langsung mati...api rokoknye," kelakar Wak Barab.*